أكيد الحب ليه غِيَّة
وليه بدل السبب مِيَّة
ساعات مثلا
عنيكي الحلوة تخدعنا
وبسهولة
في وسط القعدة تجمعنا
ومن ضمن الكلام برضه
حاجات متشالة جوا القلب
ومش كل البشر والناس
عشان حُبِّك يدُقُّوا الباب

بحبك حب
مش في قصيدة أو قصة
دا حبك في الفؤاد يِرْشَقْ
بتسبيلة وكمان بصة
ونظرة عين بتسكرني
وبتخلي الحياة حلوة
وانا اللي عشقت فيكي حاجات
وشفتك أجمل الأشياء
وعمري ماكون في يوم كداب
بحبك حب مش إعجاب

واحبك حب بالفطرة
واعيشك حالة أو فكرة
وعمر هواكي ما يسيبني
ولا الأوهام تعذبني
واشوفك جاية بعد غياب

أمل يجري ف عروق دمي
واشوفك شايلة يوم همي
بنقسم في الهوا قلوبنا
ونغرق ويا بحر الشوق
نسيب الحب في دروبنا
وننسى همومنا يوم ونروق
ونرجع برضه تاني شباب