بقلم …محمد فرج الله الشريف
أنا : مصر مستنيه إيه ؟ هتحارب امتى ؟ مش شايفين اللي بيحصل في غزة ؟
أنا : وتحارب ليه وعدوها بيستنزف لوحده من تلقاء نفسه ورجالة غزة قايمين بالواجب ؟
أنا : والدم الفلسطيني اللي بيسيل أنهار هنسيبه ينزف وإحنا واقفين نتفرج ؟
أنا : دخول مصر الحرب هيزود الدم حضرتك مش هيقللها
أنا : هييجي يوم وهنندم ونقول أكلت يوم أكل الثور الأبيض
أنا : الثور الأبيض ده أنا اللي مربيه وحاطط فيه سم علشان لما يكلوه ييموتوا يا يوصلولي مدروخين أقدر أخلص عليهم
أنا : مع الإجرام اللي بيحصل ده الجهاد دلوقتي بقى فرض عين وواجب علشان نحرر الأرض المحتلة والمسجد الأقصى
أنا : تحرير المسجد الأقصى طريق مليان بالدم , والجهاد اتنقل من الجهاد بالكلام إلى الجهاد بالفعل , والجهاد يعني دم فمينفعش نبكي على دم نزف في الجهاد علشان نحرر المسجد الأقصى .
أنا : خلينا نتكلم بوضوح مصر خانت القضية وبتساعد الاحتلال وضيقت الخناق على أهل غزة .
أنا : نفسي المقاومة نفسها تطلع تقول الكلام ده , لكن المقاومة كل يوم تطلع تشكر مصر على مواقفها
أنا : أمال الجيش والسلاح اللي دفعنا فيه مليارات ده لزمته إيه ؟
أنا : علشان نحارب بيه ولكن في الوقت المناسب لما تخلص كل أوراق الضغط علشان دخول مصر الحرب معناه حرب عالمية محدش عارف هتنتهي على إيه
أنا : يعني هنسيب إسرائيل كدة تفجر وتكسر وتقتل واحنا متكتفين ؟
أنا : لما تقدر تفسد مخططات عدوك من غير حرب هو ده قمة الإبداع والتميز ’ الانتصار الحقيقي إنك تحرم عدوك إنه يحقق أهدافه وده اللي احنا ناجحين فيه لحد دلوقتي .
أنا : انت وأمثالك خاينين ودمكم بارد معندكمش نخوة ولا شهامة
أنا : أنت متهور وبتحكم بعاطفتك مش بعقلك وبتشوف المشهد من زاوية ضيقة لكن صاحب القرار شايف المشهد بكل أبعاده .
أنا : الخيانة والتواطؤ بقى عقل وحكمة يا بياعين الوطن والدين يا شوية نعاج
أنا : نعاج !؟ مش أحسن ما أبقى تور هايج زيك معندوش عقل !
أنا : احترم نفسك ( طاخخخ )
أنا : هي وصلت لمد الإيد طب خد ( طااااااااااخخخخ ) .
