بقلم الكاتبة…رؤى مظلوم

حواري مع الاخصائية لما حسن، تاسيس عظم الطفل يبداً من متى ؟
الطفل بيمر بعدة مراحل غذائية، وهاي المراحل تعتبر من أهم الفترات في حياته، لأنها بتأسّس جسمه ونموه وصحته لباقي العمر، وعشان هيك تلبية احتياجاته بهالمرحلة شيء كتير ضروري. أول 6 شهور من عمر الطفل، أكله بيكون بس عبارة عن حليب، ويفضّل طبعًا إنه يكون من الرضاعة الطبيعية لأنها الأفضل وبتعطيه كل اللي بيحتاجه، بس إذا ما كانت الرضاعة الطبيعية ممكنة، بنلجأ للحليب الصناعي المخصص للرضع.

بعد ما يتم 6 شهور، بنبدأ ندخلله الأكل الخارجي شوي شوي، وبنضل محافظين على حليب الأم كمصدر طاقة أساسي لأنه معدته صغيرة ولسه ما بتقدر تتحمّل كميات كبيرة. بهالفترة، بنبدأ نطعميه أكل ناعم كتير، زي الخضار المسلوقة والمهروسة منيح، وبياخد كميات صغيرة، تقريبًا ملعقة لملعقتين، مرتين باليوم. ومن بعد الـ6 شهور، بيقدر ياكل أغلب أنواع الأكل الصحي بس أهم شي نراعي قوام الأكل ونقدمه بالتدريج عشان نتجنّب أي نوع من الحساسية، وبننتبه إنه العسل ممنوع قبل عمر السنة.

ومع الوقت، معدة الطفل بتكبر، وبصير قادر ياكل أكتر، يعني مثلًا بعمر 9 لـ11 شهر، بصير يقدر ياخد نص كوب من الأكل 3 لـ4 مرات باليوم. قدرته على المضغ بتتحسّن، وبنقدر نبلّش نعطيه أكل مش مهروس بالكامل، يكون مقطّع صغير ومناسب إله. كمان بهالمرحلة بصير يلمس الأكل، ويجرب ياكل بإيديه، وهاي مهارة مهمة لتطور الطفل.

أما بالنسبة لتأسيس العظام، فهالشي ببلّش من الأسبوع السادس بالحمل، وبيضل مستمر بعد الولادة، وعشان هيك لازم نهتم بتغذية الأم من أول الحمل، ونهتم كمان بتغذية الطفل بعد الولادة لحتى نضمن نمو عظامه بشكل سليم.

فيه كمان سؤال بيتكرر من الأمهات: كيف ممكن نقوّي دم الطفل ونمنع فقر الدم اللي ممكن يأثر على الذكاء؟ بالنسبة لأول 6 شهور، لو الطفل بيرضع رضاعة طبيعية بس، فبنحتاج نضيفله مكملات حديد من عمر 4 شهور، طبعًا باستشارة الطبيب. وبعد عمر 6 شهور، لازم نهتم إنه ياخد أطعمة غنية بالحديد، زي صفار البيض، والعدس، واللحمة، وكمان نساعد جسمه يمتص الحديد بشكل أفضل عن طريق فيتامين C، يعني مثلاً نطعميه مع الأكل شوية فواكه زي البرتقال أو الطماطم. كمان بنفصل بين الأكل اللي فيه حديد وبين مصادر الكالسيوم، زي الحليب، لأنه بقلل من امتصاص الحديد.

سؤال من قارئة !!ابني عنده عام وشهرين ولا يمشي ولكن يستطيع ان يمسك الأشياء ويقف مسنود ماهي الأسباب؟
هنا لازم نحكي إنه تأخر المشي ممكن يكون إله أسباب كتير، بعضها تغذوي. يعني لما يكون فيه نقص بعناصر مثل فيتامين D، الكالسيوم، الحديد، والزنك، طبيعي إن الجسم ما يتطور بسرعة، خصوصًا من ناحية العضلات والعظام. كمان إذا الطفل عنده ضعف شهية أو فقر دم أو وزنه قليل، بنصير نشك إنه فيه نقص تغذية. بس بنفس الوقت، مش كل تأخر في المشي سببه التغذية، ممكن يكون لأسباب عضلية أو عصبية، وعشان هيك إذا الطفل ما مشي بعد هالفترة، بننصح الأهل يراجعوا طبيب أطفال أو أخصائي نمو. ونصيحتي الدائمة للأمهات: خلي الطفل يطلع بالشمس كل يوم الصبح، وقدّمي له أكل فيه بروتين، وبيض، وخضار ورقية، ومنتجات ألبان.

وفيه كمان سؤال من أم بتقول: بنتي عمرها سنة و4 شهور وشعرها خفيف كتير، طبيعي؟ بهالعمر، خفة الشعر غالبًا شي طبيعي، خصوصًا إذا ما في علامات ضعف عام زي تساقط الشعر من مناطق محددة، أو ضعف واضح بالنمو. الشعر عند الأطفال بياخد وقت لينمو، وكل طفل مختلف عن التاني.

كيف نعرف الوزن الطبيعي والطول للطفل ؟
نعرف إذا طول ووزن الطفل طبيعي، فبنقيسه باستخدام جداول النمو اللي معتمدة من منظمة الصحة العالمية، وبنقارنها مع عمر الطفل. المهم مش الرقم بس، الأهم إن النمو يكون مستمر، وما يكون فيه ثبات أو تأخر واضح، وهون بننصح كل الأهالي إنهم يراجعوا أخصائي بشكل منتظم لحتى يتابعوا نمو الطفل من بدايته.