وكنت البلسم الشافي
وشوق دافي
يادوب لكن.. قصاد الناس
منايا إنت وشفايا
دوايا معاك
هوى بإخلاص
حبيبي بس راعيني
وبُص بجد تلاقيني
مَلَك.. إحساس
كفاية يا عمري أوصفلك
وجع خلاني أتألم
ومن عمري
سنين بتروح ولا اتكلم
وقلبي كمان رحل عني
وتاه وياك
وفضلت توهة تلازمني
كأن الكحل في المرود
بلا سنّي
يغازل لمعة الننّي
يا عمر العمر يا عمري
وقف عمري.. وقف سنّي
وقف إحساسي بالهمسة
وباللمسة
ورحلت معاك
في دنيا حلوة بتاخدني
في بحر هواك
وأرجع تاني وأدوّر
عليك ما الاقيك
يا قلبي كفاية باتوجّع
وفين أراضيك
أبوس إيدك أبوس خدّك
عشان أرضيك
واحط ايديَا على شعرك
واقول شِعرك
أقضّي العمر وانا جنبك
وأغزلك.. قصايد حُب في حبَّك
يا عشق العشق يا عشقي
أنا المُهرة اللي بتنادي لخيّالها
تعدّي بحور وتتمنى تشوف طيفه
وترسم صورته بخيالها
على كيفها وعلى كيفه
خيال بخيال وخيّالي
صبح يا دمعتي خالي
لا داري باللي انا حاسّاه
ولا حتى بأوصافي
وكان النبع لو صافي
وكان البلسم الشافي
وكان الناس
قمر ونّاس
وشوق دافي
منايا هوّ وشفايا
هوى بإخلاص