بقلم الشاعرة / إيمان ربيع العقيلي
ياللي هناك وهناك عالي
وحشتني إيه أحوالك
دايمًا بتخطر على بالي
وخيالي بينادي خيالك
أقول انساك.. ومااقدرشي
واقول حاسّاك.. ماباعرفشي
وانادي عليك ماتسمعشي
يغيب عن قلبي موالك
حبيبي ليه بنتغرّب
ونبعد كل ما نقرّب
وسبنا العمر يتسرّب
وحالي يبكي على حالك
بخطوة تايهة وشريدة
وخطوة شايلة تنهيدة
باشوف روحك سما بعيدة
حبيي استنى جايالك
في بحر خيال من الأوهام
باعيشك بس في الأحلام
تاخدني رحلة الأيام
منايا اتملى في جمالك
أنامنّك وقلبي فداك
شبه وردة تنادي نَداك
أقولك سر: أنا رايداك
وقلبي سبقني عدّالك
عشان في القلب شايلالك
محبّة تشتهي وصالك
ياريت تبعت لي مرسالك
ياريتني بجد على بالك
